الأربعاء، 29 أكتوبر 2008

رسائل قصيره ....


رسائل قصيره

(غيبوبه )

صديقتى

تصفعنا الحقيقه

وتستمر الغيبوبه

ونغلق عين ونفتح اخرى

فى بلاهه من لا يدرى

ربما اصبحنا بحاجه

الى صاعق

ربما

اتت الحياه

او انتهينا

....

(الشىء)

هذا الذى لا اسم له

او من اود حذف اسمه من قاموس اللغه

هذا (الشىء) ان صح ان نطلق عليه هذا التعبير

ربما لانه لا يصح ان ينتمى الى

انا او هو او نحن

هذا الشىء

الذى لا يمكن بحال ان نعتقد بوجود

نبض او مشاعر تحركه

والذى يتحرك وفق خطه سابقه التحضير

لامتصاص الروح وجعلها جافه مقتربه من الهرم او الموت

هذا الشىء

الذى لا يحمل سوى ثقل بصمه الالم فى نفسى

اخبره:

الاشياء من السهل ان تكسر

فلا تغتر

فقط انتظر لترى

...

(الاقربون)

الاقربون اولى بالمعروف

يبدو

انى لا امت بصله لاحد

......

تكرار

كلماتى المكرره
كمشاعر الوجع المكرره
كاحداث الالم المكرره
يبدو ان الدائره محكمه
وانا بعد
لم اصل حد الملل

......


الثلاثاء، 21 أكتوبر 2008

كركبات شتويه ..مدونتنا الجديده ...


كركبات شتويه ...
مدونه مشتركه جديده مع الرائعه ريم والعزيز انس ..
هواجس مؤرقه .. كركبات بالنفس ان الاوان لانطلاقها..
شاركونا..
ربما
وجدت بعض من نفسك هناك ...
اتمنى تنال اعجباكم...


http://karkabat.blogspot.com/

الاثنين، 6 أكتوبر 2008

بتنجان احمر بتنجان ........


بتنجان اسود خربان ..

حنخلى حياتكم اى كلام


من زماااااااااااااان مشوفتش افلام ..الواحد اصلا عايش فيلم ابيض واسود وساعات بالالوان الغامقه
فمش ناقص يشوف حجات تجيب شلل رعاش وعقده يغلب فيها الدكاتره النفسيين
بس نقول ايه لما الواحد يزن على خراب عقله وفقع مرارته ويقعد يتفرج على حاجه تضحكه
وطبعا لاننا شعب ابن نكته وبنموت فى الضحك حتى على خيبتنا ..فكان فيلم مورجان اللى اتعمل له ضجه ولو انى قررت اسميه بتنجان اسود خرباننظرا لان كميه البذر اللى مرر طعم البتنجان الاسود كانت زايده 3 شويات

ومن هذا المنطلق البتنجانى

قررت اعمل نفسى ناقده


اشمعنى انا يعنى ماكل من هب ودب بيجى يقول كلمتين مكلكعين ومكعورين ويقولك دا نقد ..
المهم يعنى
للامانه العلميه المعمليه الفذه انا مشوفتش كل الفيلم اصل كان ممكن لوشوفته كله كنت اتنقل الى الرفيق الاعلى نتيجه ارتفاع مفاجىء فى ضغط الدم ...الراجل اللى بيشترى كل الدنيا بفلوسه
والدنيا كله ماشاء الله انعدمت من الاخلاق وبتتباع بسرعه اوى .والاب اللى رغم انه بيشترى كل الناس وكله عنده بالرشوه الا انه سبحانك يارب
جاب لنا اتنين شباب مكافحين فى الجامعه الامريكيه ..حاجه كده تفرح ضمير ايه وبتنجان ابيض ايه
وقوم ايه محتاجين يتشرفو بباهم دراسيا بما ان بباهم بيشترى كل حاجه بفلوسه
وتشوف شويه مشاهد فاضيه وهو بيستخف بعقل المشاهد الغلبان اللى بيتفرج بنص عين اصلا لان بقيه عينه بتنام من ارهاق الشغل
او ارهاق التفكير فى الشغل للى مش شغالين يعنى

ويمشى الفيلم كده فى مشاهد فعلا بتبعبر عن الشعب فى الجامعه الامريكيه طبعا مهو احنا كلنا خرجين جامعه امريكيه زى مانتو عارفين ويجى المشهد اللى فرسنى محمود رجل الدين اللى تقريبا جابه من قريش فى ايديه وجيه
قوم ايه يجيب لك شويه بنات محجبات وهو واقف يقول خطبه عصماء اول مره ضد بتنجان
تانى مره بقى مع بتنجان قلبا وقالبا وتصوير لان الناس دى عقلها مغيب
الدين وابسط تعاليمه زى رفض الرشاوى او ارتداء الحجاب اللى هى فريضه اصلا بقت شىء بيشترى ويتباع
ومحل سخريه من بسلامته مش مهم حيجى حد يقولى انتى اخدتيه بتعصب كده ليه
ميقصدش الراجل
ماشى


يجى المشهد البديع
طبعا متنكروش ان كل يوم احنا بنرقص فى مظاهره من المظاهرات اللى بتندد وبتشجب
طبعا بنرقص فى الشارع ولا فى الحرم الجامعى اومال ايه ؟؟هو احنا ورانا حاجه نعملها الا الرقص
دا احنا حتى بنحب نعمل كل حاجه فى حركات ايقاعيه راقصه احنا شعب فونان بالفطره
المهم حبطل دخول فى حوارت جانبيه
الاستعراض الجميل والناس كلها واقفه تقول بتنجان احمر بتنجان

لالالالا

وناس تانيه اه اه

وبعدين هو يقولهم حتعيشو حياتكم بالمجان ..فينضم له كل الناس ويسيب يعينى الغلابه التانين
فى وسط الغلابه اللى ملخصهم اصلا الدكتورهوعياله لقيت واحد كده ..واحد وحيد مقدرش يشتريه

ياترى مين الفلته دا
ياترى مين اللى كله ضمير واللى محدش يعرف يشتريه بكنوز الدونيا طبعا مظبوط الناس اللى لاحظت زيى اكيد حتعرف
انه الفنان
يعنى اشترى رجل الدين اللى جيبينه من قريش فى ايديهم
واشترى دكاتره واساتذه الجامعه
لكن الفن
لاا

لا ياعمرو
الا الفن
عض كلبى ولا تعض فنى
الفنان مش ممكن فلوس الدنيا تشتريه
الفنان
بيتعب علشانا
بيتعب علشان مبادئه واخلاقه وقيمه الساميه والحاميه والباميه
الفنان
بيسهر الليالى
مبينمش الليل من كتر تفكيره ازاى يوصل
الاخلاق البتنجانيه للشعب
ازاى يرفه عننا
ازاى يصبرنا على مابلانا
الفنان فعلا اللى متقدرش تشتريه بالفلوس

ويوصل بيك الفيلم
بكل سذاجهوسطحيه محببه لنفوسنا حيث ان التعمق دا مضر جدا بصحتنا واسره الفيلم فنانين وعارفين ايه اللى يضرنا وايه اللى ينفعنا اكتر مننا يوصل لحد انه يالا الكارثه الكبرى تحاربه الدكتوره وتمسكه متلبس بقضيه غش
ويجى لبنته المسكينه خرس
يشبه بالظبط اللى جالى لما شوفت الفيلم ومدى عمقه السطحى حد السفه

ويفوق

اخيرا
البتنجان الاسود يحب يبقى ابيض
ويقعد مع اولاده اللى من اول الفيلم لاخره ضميرهم منور على طول الخط مش عارفه دا لانهم بيشربو ديو كتير ولا لانهم مش محتاجين ضلمه ولا لانهم جامعه امريكيه (عقد بقى بعيد عنكم)ولا لانهم ميعرفوش يعنى ايه الدنيا تضلم النور مقطعش حداهم قبل كده
المهم يعنى الولاد المكااااااافحين يذاكرو للبتنجان ..علشان يتحول البتنجان الاسود لبتنجان ابيض ويحشو نافوخنا لاخر مشهد بسذاجه محببه جدا لنفوسنا مااحنا بنموت فى اللى يضحك علينا ويدينا على قفانا سورى يعنى لمؤخذه ياشباب
ونقول كااامااااان

طولت عليكم
معلش ياجماعه
اعذرونى
اصل انا مش فنانه
انا واحده جايه مع قريش
ولابسه حجاب مغطى افكارى
ومبعرفش ارقص
سورى
بابا نسى يعلمنى

.................

دى اخره اللى يتفرج على افلام