الاثنين، 6 أكتوبر 2008

بتنجان احمر بتنجان ........


بتنجان اسود خربان ..

حنخلى حياتكم اى كلام


من زماااااااااااااان مشوفتش افلام ..الواحد اصلا عايش فيلم ابيض واسود وساعات بالالوان الغامقه
فمش ناقص يشوف حجات تجيب شلل رعاش وعقده يغلب فيها الدكاتره النفسيين
بس نقول ايه لما الواحد يزن على خراب عقله وفقع مرارته ويقعد يتفرج على حاجه تضحكه
وطبعا لاننا شعب ابن نكته وبنموت فى الضحك حتى على خيبتنا ..فكان فيلم مورجان اللى اتعمل له ضجه ولو انى قررت اسميه بتنجان اسود خرباننظرا لان كميه البذر اللى مرر طعم البتنجان الاسود كانت زايده 3 شويات

ومن هذا المنطلق البتنجانى

قررت اعمل نفسى ناقده


اشمعنى انا يعنى ماكل من هب ودب بيجى يقول كلمتين مكلكعين ومكعورين ويقولك دا نقد ..
المهم يعنى
للامانه العلميه المعمليه الفذه انا مشوفتش كل الفيلم اصل كان ممكن لوشوفته كله كنت اتنقل الى الرفيق الاعلى نتيجه ارتفاع مفاجىء فى ضغط الدم ...الراجل اللى بيشترى كل الدنيا بفلوسه
والدنيا كله ماشاء الله انعدمت من الاخلاق وبتتباع بسرعه اوى .والاب اللى رغم انه بيشترى كل الناس وكله عنده بالرشوه الا انه سبحانك يارب
جاب لنا اتنين شباب مكافحين فى الجامعه الامريكيه ..حاجه كده تفرح ضمير ايه وبتنجان ابيض ايه
وقوم ايه محتاجين يتشرفو بباهم دراسيا بما ان بباهم بيشترى كل حاجه بفلوسه
وتشوف شويه مشاهد فاضيه وهو بيستخف بعقل المشاهد الغلبان اللى بيتفرج بنص عين اصلا لان بقيه عينه بتنام من ارهاق الشغل
او ارهاق التفكير فى الشغل للى مش شغالين يعنى

ويمشى الفيلم كده فى مشاهد فعلا بتبعبر عن الشعب فى الجامعه الامريكيه طبعا مهو احنا كلنا خرجين جامعه امريكيه زى مانتو عارفين ويجى المشهد اللى فرسنى محمود رجل الدين اللى تقريبا جابه من قريش فى ايديه وجيه
قوم ايه يجيب لك شويه بنات محجبات وهو واقف يقول خطبه عصماء اول مره ضد بتنجان
تانى مره بقى مع بتنجان قلبا وقالبا وتصوير لان الناس دى عقلها مغيب
الدين وابسط تعاليمه زى رفض الرشاوى او ارتداء الحجاب اللى هى فريضه اصلا بقت شىء بيشترى ويتباع
ومحل سخريه من بسلامته مش مهم حيجى حد يقولى انتى اخدتيه بتعصب كده ليه
ميقصدش الراجل
ماشى


يجى المشهد البديع
طبعا متنكروش ان كل يوم احنا بنرقص فى مظاهره من المظاهرات اللى بتندد وبتشجب
طبعا بنرقص فى الشارع ولا فى الحرم الجامعى اومال ايه ؟؟هو احنا ورانا حاجه نعملها الا الرقص
دا احنا حتى بنحب نعمل كل حاجه فى حركات ايقاعيه راقصه احنا شعب فونان بالفطره
المهم حبطل دخول فى حوارت جانبيه
الاستعراض الجميل والناس كلها واقفه تقول بتنجان احمر بتنجان

لالالالا

وناس تانيه اه اه

وبعدين هو يقولهم حتعيشو حياتكم بالمجان ..فينضم له كل الناس ويسيب يعينى الغلابه التانين
فى وسط الغلابه اللى ملخصهم اصلا الدكتورهوعياله لقيت واحد كده ..واحد وحيد مقدرش يشتريه

ياترى مين الفلته دا
ياترى مين اللى كله ضمير واللى محدش يعرف يشتريه بكنوز الدونيا طبعا مظبوط الناس اللى لاحظت زيى اكيد حتعرف
انه الفنان
يعنى اشترى رجل الدين اللى جيبينه من قريش فى ايديهم
واشترى دكاتره واساتذه الجامعه
لكن الفن
لاا

لا ياعمرو
الا الفن
عض كلبى ولا تعض فنى
الفنان مش ممكن فلوس الدنيا تشتريه
الفنان
بيتعب علشانا
بيتعب علشان مبادئه واخلاقه وقيمه الساميه والحاميه والباميه
الفنان
بيسهر الليالى
مبينمش الليل من كتر تفكيره ازاى يوصل
الاخلاق البتنجانيه للشعب
ازاى يرفه عننا
ازاى يصبرنا على مابلانا
الفنان فعلا اللى متقدرش تشتريه بالفلوس

ويوصل بيك الفيلم
بكل سذاجهوسطحيه محببه لنفوسنا حيث ان التعمق دا مضر جدا بصحتنا واسره الفيلم فنانين وعارفين ايه اللى يضرنا وايه اللى ينفعنا اكتر مننا يوصل لحد انه يالا الكارثه الكبرى تحاربه الدكتوره وتمسكه متلبس بقضيه غش
ويجى لبنته المسكينه خرس
يشبه بالظبط اللى جالى لما شوفت الفيلم ومدى عمقه السطحى حد السفه

ويفوق

اخيرا
البتنجان الاسود يحب يبقى ابيض
ويقعد مع اولاده اللى من اول الفيلم لاخره ضميرهم منور على طول الخط مش عارفه دا لانهم بيشربو ديو كتير ولا لانهم مش محتاجين ضلمه ولا لانهم جامعه امريكيه (عقد بقى بعيد عنكم)ولا لانهم ميعرفوش يعنى ايه الدنيا تضلم النور مقطعش حداهم قبل كده
المهم يعنى الولاد المكااااااافحين يذاكرو للبتنجان ..علشان يتحول البتنجان الاسود لبتنجان ابيض ويحشو نافوخنا لاخر مشهد بسذاجه محببه جدا لنفوسنا مااحنا بنموت فى اللى يضحك علينا ويدينا على قفانا سورى يعنى لمؤخذه ياشباب
ونقول كااامااااان

طولت عليكم
معلش ياجماعه
اعذرونى
اصل انا مش فنانه
انا واحده جايه مع قريش
ولابسه حجاب مغطى افكارى
ومبعرفش ارقص
سورى
بابا نسى يعلمنى

.................

دى اخره اللى يتفرج على افلام



هناك 12 تعليقًا:

blue-wave يقول...

هههههههههههههههههههههههههه
طيب وانا مالى انا؟؟؟
تقوليلى لا يا عمرو؟؟؟؟
بس بجد فيلم يشل
انا اتفرجت عليه من سنه تقريبا ولحد دلوقت باخد جلسات علاج طبيعى:))

ناعومى يقول...

والله انت بطل يادكتور عمرو
شكلك كملت البوست لاخره هههههههههههههههههههه
اصل انا كتبته ساعه الفجر وانا قاعده مستنيه انزل الشغل ومنمتش يومين قبلها
فمخدتش بالى انى طووووووووولت اوى
ههههههههههههههههههههههههه
البوست دا ياعمرو اختبار فى الصبر وطول الباااال

وبعدين قولى اخبار العلاج الطبيعى ايه
جاب نتيجه يعنى ولا توابع الشلل مش راضيه تروح

طمنى على نفسى يادكتور

نورتنى ياعمرو واولرد
وخايفه يكون اخر ردهههههههههههههههههههههههه

ســـــــهــــــــــر يقول...

ده مش بتنجان دى ازمة عيد

و انتى عبرتى عنها ف ضحكه و كتير منا كبتها

و برغم كده كان واحشنى اقرا شعرك فنزلت لتانى بوست و سببت لك تعليق فيه

كل سنه و انتى طيبه

Teawater يقول...

هههههههههههههههههههههههههه
جااامده اوي بجد يا دكتورة بس انا شايفه ان عادل امام بيحاول يثبت وجوده عشان ما يولوش راحت عليه فايلا نستحمل وبعدين هو يمكن اتعدل شويه ف حسن ومرقص بس بيتهيئلي لأ برده هو زي ما هو
ميرسيه لأنك اسعدتيني

ضد التيار يقول...

الصراحه انا ماشفتش الفيلم لانى بطلت اتفرج على افلام عربى كتير الواحد مش ناقص ضغط وشلل و امراض ماليها اول من اخر

بس ماشاء الله تحليل مطول مفصل شامل و مدحت كمان (:

و بيما انه فيلم عربى فاطبيعى جدا اللى انتى قولتيه و قلب الموازين اللى هو قالبها

كيارا يقول...

ههههههههههههههههه

نهار الوان كل ده في الفيلم

كل ده يادهوتي ياني

الحمد لله اني مش شفته او شفت غيره


لحسن الضغط عندي بيشاور عقله بيني وبينك

نصيحه بقي بلاش افلام ها الضغط بيشاور عقله انا بقول اهو

تحليل جااااااااامد

الفارس الملثم يقول...

بصراحه انا مشفتش الفيلم يمكن لاني مبقاش يجيلي مراره اتفرج علي فيلم عادل امام ..

بصي انتي لو دخلتي فيلم لعادل امام ومش لقيتي شيخ منافق متعصب فردة جزمته بتفهم احسن منه يبقي اكيد في حاجه غلط , للاسف دي التيمه الشهيره لافلام عادل امام السطحيه والتهكم علي رجال الدين والسخريه من كل شئ له قيمه

بس يا دكتوره برده الافلام دي بتفيد الدكاتره بتجبلهم زباين كتير عندهم الضغط والسكر والمراره هههههههه

تحياتي دوما

الازهرى يقول...

صديقتى العزيزة

لا اتفرج عادة على افلام عربى عادة ولكن احد اصدقائى الله يكرمه دبرلى المقلب ده

الفيلم يحتوى على الكثير من القيم الجميلة والافكار النيرة والاخراج السليم ومعالجة العديد من مشكلات المجتمع
وطبعا هذا هو العادى من عادل امام

أليس هذا هو رأى الجميع أيضا ؟


تحياتى

dido يقول...

السلام عليكم
والله دي اوي زياره ليا هنا
وشايفه ان في ناس معلقه
هو في كلام بجد ولا انا بعد لما وصلت للجامعه لسه مش عارفه اقرا :))
مين مع مين بقي ها
بس علي فكره انا محتجه انا بعترض:))
تقبلي مروري

romansy يقول...

ههههههههههه
كويس ان بابا مش علمك الرقص
بس علمك الصراحه
ودى اجمل شئ
شكرا على نقدك الصريح
تقبلى مرورى

fOsDö2ä يقول...

نعنع ...
أنا كنت مستنيه شويه كده بس ...
و استنيت شويتين تلاته معاهم ...
و جيت تاني ... !! D:
أصلي كنت عايزه أثبتلك حاجه ...
و الحمد لله أتثبتت ... D:

البوست طبعاً جميل جداً ...
و طريقة العرض جميلة قوي ...
أنا فاكره ساعيتها فضلت أضحك ...
و كنت خايفه الناس تصحى وتقول عليا مجنونة ... D:

تسلم ايدك يا نعناعه ... (f)

ريم عبد العزيز يقول...

طيب انا احط ايدي علي اللي جنابك معترضه عليه وانا اقول علي طول....