صديق قلت له الحمله فى الشغل النهارده كانت حمله سواد ...قالى ايه الالفاظ الكئيبه دى سواد ايه بس.. متقليش كده ..قلت له حاااااضر ..كانت حمله ملهاش لون ..حلو كده ؟؟
وعلشان مقلش انها خواطر سوده قلت اضحك على نفسى وعليكم ..واعمل نفسى شيك فى اكتئابى وحزنى وا قولكم انا مكتئبه من غير سواد يعنى مكتئبه بالالوان ...
طبيعه الحال للى متعود زى حالاتى يعنى ..لما بتطبل بتبقى فى كل ناحيه ..ياترى دا لانها فرصه لكل الالوان الغامقه انها تتحد عليك مره واحده علشان تحسسك ان حياتك سوده يييييييييوه اقصد ملهاش لون ...
ولا انت بتبقى حساس اوى لدرجه ان لو صوت عابر معدى جنبك حتعتبره دوى قنبله وتقول انه قتلك ؟؟
زمان كان ممكن افضى بمشاكلى لبعض الاصدقاء او لاخواتى فى البيت وكانو جزء من صدقاتى ..بمرور الوقت بقيت اسكت اكتر واكتر لحد مابقى السكوت علامه الجمود ..بعض الناس علمتنى ان لحظات الفضفضه نوع من الضعف حتستغل بشكل او اخر ضدك ..يبقى الاجمل انك متضعفش ..هناك استثاء للقاعده لكن فى الغالب احتفظ بهمك لنفسك اضمن لك ..
بس الجميل فى المدونه ان معظم اللى بيزروها هما بالنسبه لى وانا بالنسبه لهم كائن غير مرئى ف ى الحياه ..
ودى يدينى مساحه حريه شويه اتكلم براحتى ...
واقول بصوت عالى وانا بخبط دماغى فى حيطه المدونه ..
انا مخنوووووووووووووووووووقه ..
انا حاسه باكتئاب وحزن مش قادره اتغلب عليه ..
بفكر نفسى انها فتره وحتعدى زى كل مره ..انى مش لوحدى المهمومه ..
ان اكيد حيحصل شىء جديد ..بس الصبر..
بس ساعات كل مرادافات التهوين والطبطبه اللى بيمارسها الواحد مع نفسه او حتى النهر مش بتجيب نتيجه
وبيبقى الحال زى ماهو ..
مشاكلى فى العمل تشبه فى مجملها مشاكلى فى الحياه بره العمل ...ودايما السؤال المصاحب ليا
اللى بردده بينى وبين نفسى كتير
هو انا كده صح ولا غلط واقعد اعيد فى حساباتى من تانى علشان اطلع اخطائى ..
هو انا غلط لو مشيت صح ولا صح لو مشيت صح
الاجابه بسيطه بس تطبيقها فى العمل تحديدا بيبقى مرهق نفسيا جدا
معاناه انك تحوال تعمل الصح فتلاقى اللوم من ناحيه وسوء الاستغلال من الناحيه التانيه
مش فاهمين؟؟؟
معلش ممكن احاول اوضح مره تانيه
بس دا اللى كان جوايا وارتحت شويه لما قلته
