الثلاثاء، 26 يناير 2010

نهى..




هى
رحلة طويله بين الضدين
وشوارع احلام مشتركه
وخطاوى اختلفت سكتها
وفراق ف الاخر
مش مقصود



بنت

عيونها بتخدك مسافات
وجدايل روحها الطفله
تتسرسب زى الشمس
من الشباك
وتطل على البرد بروحك
فتطمن كل المتعرى
بفعل الازمات
.....
تتقلب زى فصول السنة
الصيف جواها نسيم مخنوق
والشتا بردان بهموم روحها
معجونه طيبتها
بسيف العند
فتقول لاء.. بكبر المشتاق
وتقدم ورده
فى وسط التلج
تتدربك روحك وياها
ازاى الاعصار يتحول طفل؟؟!ّ
............
نهى
اوراق جواباتك
ومشاعر بنت العشرين
والورد اليامه المتحنط
لساهم متشالين
جوا اوضه ف قلبى
وبيسالونى ساعات
اخبار نهى ايه
بعد التلاتين
.....

هناك تعليق واحد:

من اجل عينيك يقول...

الله يانعمة كتاباتك وحشتني
فاكرة لما كنتي بتشرحي لي نصوصك وابقى مبهورة بيها بعد الشرح
الشرح بيفسد كل القصائد إلا قصائد ناعومي

قصيدة جميلة اوي . مش عايزاك تتأخري في الكتابة عشان تفضل روحك متوهجة وماتنطفيش


مين نهى بقى؟