الخميس، 13 مارس 2008

يبقى انت اكيد..اكيد فى مصر...


هو فيه ايه؟؟ساعات كده الواحد بتقف معاه حجات عاديه جدا بس غصب عنه بيتنح لها ويفتح بقه ويفنجل عنيهويقول هو فيه ايه ؟؟؟؟وبعدين ميعرفش يعمل حاجه غير انه يضحك ويضحك ويضحك لحد ماعينه تدمع وبعدين نضرب كف بكف ونقوله اما صحيح هم يضحك وهم يبكى..
والجميل ان الحمد لله نص همومنا اللى تموت بتضحك اوى..
عارفين ليه ؟؟؟
من كتر ماهى وكسه وخيبه وشىء غير متوقع ابدا انه يحصل لناس عايشه على الكوكب ..ويجاورها بعد شويه مسافات ارضيه وجويه بلد زى انجلترا ولا اى بلد محترم بيحترم ان فيه حاجه- نحط تحتها مليون خط -اسمها احترام عقل البنى الادمين دا طبعا غير اعتبار الانسان كائن حى من حقه يعيش عيشه كريمه ويموت موته كريمه ومحترمه..مش موت من الجوع ولا من البرد ولا من الاهمال المستفز ...
اكيد فيه البعض لسا مواظب على فقع مرارته مرتين على الاقل يوميا بقرايا الجرايد ومعرفه اخبارنا اللى تغم واللى لا تسر عدو ولا حبيب لا الحقيقه هى تسر اى عدو..ويمكن حد من الناس اللى مرارتها اكس لارج وبتقرا الجرايد وقعت عينيها على الخبر بتاع وفاه دكتور فى كليه الادب فى مستشفى القصر العينى الفرنساوى ...
وسبب الو فاه المذكور هبوط حاد فى الدوره الدمويه ...
الدكتور دخل المسشتفى قبل وفاته ب13 ساعه علشان مغص حاد ..الاستقبال ومادارك مالاستقبال وطبعا فى الجرايدالقوميه تقول براحتها احنا عارفين الاستقبال فى اى مستشفى حكومى منزوع الضمير والامكانيات شكله ايه ؟؟
المهم يعنى اطمنو ان قلب الدكتور سليم الحمد لله ..الطبيعى فى حاله اعتقد ان تشخيصها المبدئى انه يتشك انها اكيوت ابدومن او للاحتياط نعاملها على الاساس دا..
مادام مفيش هيستورى معين لحاجه ومش عارفين فيه ايه .. وللاحتياط برضه ومراعاه لان دى حياه انسان بيتعمل سونار ..بس سونار الاستقبال عطلان وسونار الا قسام بيشتغل لحد الساعه 8 ..والدكتور للاسف تعب بعد 8 مش يظبط مواعيده دا حتى عيب قوم ايه بقى يااخونا الاول دكتوره قالت دا معندوش حاجه روحوه..الدكترو يمكن بيدلع ولا حد زعله فمغص شويه وحيروق .. ودكتور تانى حن عليه وقال لا احجزوه يتعمل له فحوصات ..واكتشفو مفيش سونار فاجلو السونار وبراءه الاطفال فى عيونهم لتاااااااااانى يوم ..عادى يعنى ايه الازمه حيحصل له ايه من بالليل للصبح دا الشعب المصرى دا تمام ومش بيموت كده بسهوله ...!!!
واهل الدكتور قالو طب يعملوه بره بس الدكتور اتحجز فمينفعش نطلعوه بره ..حيتعالج عندنا يعنى حيتعالج عندنا واتحط فى عنبر على سرير مفيش بطانيه عليه و فى عز التلج الممرضه الوحشه الوحشه ياي خالص غطته بملايه بس وهاتك يامسكنات طول الليل لحد اخر مسكن الدكتور اتجمد وحاولو يفوقوه بالصدمات الكهربائيه لكنه كان غلطان وفارق الحياه ...بالسهوله والسرعه دى شكل الدكتور الله يرحمه مكنش عايش فى مصر ..لو كان عاش عمره كله فى مصر كان لازم يستحمل شويه عن كده ...البقاء لله اتوفى الدكتور والاعلام اخد خبر ..
وطبعا دى حجات بسيطه جدا ..بتحصل عندنا كل يوم دا العادى يعنى..اللى بجد خلانى وقعت من طولى لما قريت الخبر تعليق مديره المستشفى المحترم وردها على الاتهامات بالاهمال ..قالت اه مكنش فيه امر عاجل يستدعى عمل سونار بناء على تشخيص الحاله (هى ناسيه انها اصلا متشخصتش ) وان السونار عطلان فى الاستقبال لكنه بحاله جيده فى بقيه الاقسام لكن مكنش فيه داعى له...!!!

طب بلاش دىبيقولك ايه بقى اخر اخر نكته والله لو ماضحكتو ازعل منكم ..كل واحد يستعد علشان دى احدث نكتنا طلع سبب الوفاه ايه ؟؟؟
اللى سبب ان الدكتور يجى له هبوط فى الدوره الدمويه ...الممرضه ايون الممرضه تمام مظبوط هى الممرضه والمديره قالت انها عو قبت على تقصيرها الممرضه الشخصيه الوحيده الغير مسئوله فى الليله كلها اصلها ايه ؟؟مغطتش الدكتور مجبتش بطانيه اى والنعمه الراجل مات علشان البطانيه !!!
دا الطب الحديث ودى مستشفياتناويبقى انت اكيد فى مصرلاتقولى سودانى ولاكولالمبورى لا تقولى امريكى ولا بتنجانىدى مصر مصر ياعمرو
متتلوثتش من نيلها بطلت تغنى لها ؟؟؟اخس عليك مطمرتش فيك بطاطينها
حد يغطينا ويصوت.........

هناك 6 تعليقات:

وجـــه جـــديد يقول...

ده الموضوع تعدى حدود الابداع الأدبي
و سرحنا في المشاكل كمان
و ماله
بس حبيت اقولك حاجة مهمة
ان مش في مصر
(صورة واحد بيطلع لسانه)

شويه جد
لا ننكر ان الطب في مصر متقدم
لكن تقدم على جثث ضحاياه

حبيبـــــــة يقول...

الاهمال مبقاش قاصر على المستشفيات قولي فيه ايه في بلدنا الحبيب مطالتوش ايد الاهمال
المشكلة ان الناس فقدت انسانيتها ودي هي المصيبه الكبرى

حبيبـــــــة يقول...

الغاليه ناعومي نسيت اقولك ان المدونه تحفه وبقى لازم اصبح عليها يوميا

ناعومى يقول...

ااااااااه شو فتنى وانا مفروسه ياوجه ..اعمل ايه لل فرسه حدود ..و احنا فى مصر معندناش حدود لاى حاجه ..بيقولك ازازه الزيت ب قت بعشره جنيه عايزه اروح اتاكد من ماما
د الموضوع كبير اوى ..مصر ياوجه مصر
لو مشربتش من مرارها تبقى انت اكيد مش من مصر ..

ناعومى يقول...

ع لى رايك ياحبيبه ياحبيبتى
الاهمال فى كل حاجه حتى ضمايرنا اهملنا نصحيها ونفكرها بان الدنيا مش نهايه المطاف ...
حبيبه قلبى منورانى وا لله
متحرمش من مرورك الكريم ابدا...

ناعومى يقول...

شرف للمدونه وصاحبه المدونه انك تنوريها كل يوم والله
دا شىء يسعدنى من كاتبه اتوسم فيها خير كتير
ربنا يبارك فيكى ياقمر