الخميس، 6 نوفمبر 2008

ساعات احلم ...

ساعات الحلم يسكنى
ويلقى ف قلبى الف براح
واضمه بشوق ماهو ضاممنى
واقول حلمى
حيجى الفرح وانا وياه
وحستنى الساعات واصبر
ومهما الرحله حتطول
اكيد عيشاه
.....
حزين فرحان
بوجع الضحكه من قلبى
وخوف م الغدر يحرمنى
فبفرح خايفه على حلمى
وبحزن لحظه تسرقنى
واقول حالى
حزين فرحان
....
انا وحلمى
ونس دايم
و لما الصحبه تنسانى
وكل الاهل والاحباب
يروحو ف سكه اللى راح
ومرجعشى
بلاقى الحلم ضاممنى
مدفى البرد ف دموعى
ب معلشى
وبسمعها يطيب جرحى
واصبر تانى ايامى
واقول بكره
حيجى نهار يشيل همى
انا وحلمى
.....

واخاف من بكره لو يجى
يغيب الفجر عن بابى
واعيش العمر ف الغربه
حزين شوقى
وتنسى الفرحه اعتابى
واقول حالى
حزين
الفرحه ناسيه هواه..
......


رد على الرائعه
الصديقه العزيزه
رام

هناك 8 تعليقات:

Sweet Violet يقول...

مش عارفه ليه شايفه التردد و الخوف فى الكلمات

دايما التفكير فى بكره بيضيع علينا الفرح

ليه نخاف من بكره ليموت الحلم و ممكن بكره ياخد الحلم فى احضانه من غير مايموت

ناعومى بجد اى بوست بتنزليه لازم اقراه كذا مره عشان اعرف ارد و اوقات مابعرفش برضه ارد

دمتٍ بكل ود

blue-wave يقول...

بجد
الله على الكلام

youssuf يقول...

لو نحلم ببكرة
و يعيد علينا فرحتنا
لو خفنا من بكرة
يكسر تاني في مئدفنا
اكيد في يوم
حيجي بكرة
و يبقي امبارح
و نشتاق ليه و نناديه
و من بكرة برضه نخاف تاني

اول زيارة لي لمدونتك لتطالعني هذه الكلمات بمجرد دخولي ..
رائع ناعومي ...
و اهلا بيكي صحيح في روايات ؛)

fOsDö2ä يقول...

ناعومى ...
كلماتها جميلة قوي ...
و إحساسها أجمل كالعاده ...
خصوصاً .. حزين فرحان ... !!
تسلم ايدك يا نعنع ...
ملاحظة : حاسه إن فيها كسر بسيط :(
يا إما أنا مش مركزه كويس ... :((
و ده مـ يمنعش إني عايزه تاني و تالت و مليون كمان ... :$

r يقول...

وبحلم وحلم بسيط
مش كتر مال ولا سيط
بحلم اكون نفسى
يسمع غنايا الطير
يغنى غنوه خير
للدنيا ولنفسى
( دى كلمات من اجمل اغانى محمد فؤاد معناها اد ايه جميل )
زى كلامك الجميل اوى كالعاده
سلمتى يا ناعومى

ناعومى يقول...

ضد التيار
طبيعه الانسان عقله دايما بيفكر فى اللى جى
لانه بيحلم
ولما نحب حلمنا اوى بنخاف عليه اوى
ويمكن خوفنا يصبح خوف مرضى
فيضيع فرحتنا
سعيده بوجودك
متحرمش منه واتمنى اكون عند حسن ظنك دايما
دمت بود

ناعومى يقول...

دكتور عمرو
اى بوست انت مش فيه بحس ان فيه حاجه غلط
نورتنى يافندم

ناعومى يقول...

يوووووووووووووووووسف
الفنان الجميل
وتفاعل جميل زى صحبه
مبسوطه جدا
عرفت توصل هنا
انا سجلت فى روايات ياعم
بس مش عارفه اعمل فيها حاجه ووقعت تانى يوم
تفتكر هى اقدام ولا ايه