الخميس، 5 مارس 2009

صفر/صفر



يالى متخبى ف ضلوعك
وف ضلوعك الف ممكن
كان حيمكن
بس وقعت
كام حقيقه مداريه
شخبطه ف فهرس مشاعرك
زى تخريفة خريفك لما يسكن
عمر فايت بالمواجع
واللى واجع روح بتعشق
دندنات لغروب مسافر
والبعيد ع القلب يخفى
لو يشيل كل اللى صبنا من اهاته
تصبح الضحكه اللى ماتت
روح بتغزل ذكرياته
والشهور التسعه تكمل
تكتمل لحظه مخاض
صرخة اولى وروحنا تايهه
صرخة تانيه دموع مهاجره
صرخة تيجى بالسكات
والهدوء يصنع شباكه
طعمه مر الاحتمال
صيد مفاجىء للى فارق
طعم خوفه
واللى بالاحساس تمرد
عاش جنونه وسط (جايز)و(احتمال)
من ضلوعه يهرب المسجون بامره
واللى خابط كل وجعه ف حيط مشاعر
ينتشى بلحظات محال
كركبات الذكريات تصبح معادله
جمع الاطراف ف ناحيه
واطرح الخوف اللى دربك عمق قلبك
تلقى كل الرحله صدقا
صفر/صفر !!







هناك 12 تعليقًا:

شخـا بيــط مـحـجـوب يقول...

تحياتى د/ ناعومى

اعجبنى جدا جدا جدا روعة الكلام ودقة الاسلوب

مدونة حقا ممتازة
تحياتى و
تقبل مرورى

شخابيط mahgoub

Sweet Violet يقول...

بيعجنى النوع ده من الكتابه عامة

و دايما بيعجبنى اسلوبك خاصه

مبروك النيولوك الجديد (:

وجه جديد د.أحمد عثمان يقول...

ناعومي
انا منبهر هذه المرة
مرة للوك الجديد
و مرة لعودة ناعومي بحق
الى الاحتراف
كده تبقى النتيجة
10/ صفر

تحياتي

blue-wave يقول...

ياااااااااااااااة
ويااااااااااااااااة
وكمان
يااااااااااااااااااااة
بجد روعه روعه روعه
انتى ليه مش بتكتبى كل يوم؟:))

عاشقه وغلبانه يقول...

والبعيد ع القلب يخفى
لو يشيل كل اللى صبنا من اهاته
تصبح الضحكه اللى ماتت
روح بتغزل ذكرياته
__________________________
الله عليك
اسلوبك جميل اوي

تحياتي

ناعومى يقول...

شخابيط محجوب
تحياتى لمروك الجميل
اتمنى ميكونش الاخير

ناعومى يقول...

سويت
ياقمره
وانا بفرح بمروك الجميل
وبعتذر عن تقصيرى الدائم
دايما منورانى
واتمنى يكون النيو لوك حلو فعلا ولا ارجع للاسود بتاعى

فريد عبد العزيز يقول...

المبدعة الرقيقة الجميلة
وكل الصفات الحلوة اللى ف الدنيا
نعمة
قد ببقى سعيد لما بقرالك حاجة جديدة
مهما تكون حزينة بس بلاقى بين سطورها
فكر وفلسفه عاليه
بجد انتى استاذة
تقبلى مرورى وعلبة حلاوة المولد
وكل لحظه ف عمرك وانتى طيبة

الفراشة الصغيرة يقول...

اول مرة اشوف
كتابه عاميه حلوة
وتشدنى قوى كده
تحياتى

د/ناعومى

كيــــــــــــارا يقول...

انا وانا بفتح مدونتك افتكرت اني فتحت ايام زمان اصل دا نفس الاستايل

اسلوبك حلو اوي

احترت بجد اقتبس ايه منه

مكل سنه وانتي طيبه

تحياتي

ســـــــهــــــــــر يقول...

طب يا ريت الرحله تخلص ..
صفر صفر
تبقى كانت ..
رحله بايخه..
و انتهينا
و الحقيقه ..
طعم مر الرحله يبدأ..
ابتدينا ..
وقت ادراك الخساير ..
و الـ بكل بساطه حدد ..
المصاير
لما وقعت غصب عنه ..
كل ماسكات الضماير
اتحسب ف اللعبه شاطر ..
و انت م الحسابات ..
تعبت
و اتهزمت
و انت بتقول النتيجه ..
صفر صفر
بس احساسك حرارته ..
تحت صفر
________________________

ناعومى

يخرب بيت كده شعر جميل
و احساس رهيب
جرجرنى جر من قلبى و رمى بحرفين غلبانين لكن حاسين ع الورق

أحمد حشمت يقول...

ولا ايه
مش عاجبنا
صفر/ صفر
طب ما هيه مش قضية
طول حياتنا
صفر/صفر
شوفت ايه
من كلامه
غير كماله
من تمامه
صفر/صفر
حر يابا
من علامه
خاف يحدد
كرب خوفه
من نتيجة حزن شافه
من شاشاته
صفر/صفر