الخميس، 10 سبتمبر 2009

مناوشات ....


من كتر ليالى العتمه بروح
مشتاقه سلام
اعلنت العصيان على نفسى
وف وسط ميدان عام لحياتى
قامت ثوره
كل القوانين
تسقط ..تسقط
كل الاحلام
تسقط ..تسقط
وحدود مفروض فيها الاوجاع
تسقط ..تسقط
ومبادىء عاشقه هزيمة البوح
تسقط ..تسقط
تسقط الوان فرحى الممنوع
وتعيش ياجنون!!
..............
انا شوفت شوارع احلامى
بتوه منى
وبيوت عفرها تراب الشوق
ف مساحة ضيقها بتتخانق
اصواتها بتعلى يزيد الخوف
يتسرسب فجر ورا التانى
ياقليل البخت ملكش نصيب
تتسند ليه على حيط مايل
وقعت ايامك م الحسبة
والجاى مغلق!!
........
ياضعيف مهزوم على ناصيه روح
بتمرجح عمرك على جايز
والشمس تغيب تغزل ف جروح
تشتاق لنسايم ضلاية
عشت لوحدك
واللقا ممنوع
هتموت متشعلق ف بداية..
....

هناك 5 تعليقات:

youssif يقول...

حتموت متشعلق في بداية ...

جميلة جدا يا نعومي ....

نفسي تروقي مرة بقا و اقرالك حاجة فيها امل ...

بس متألقة برضه و جميلة جدا

و بتلعبي في اوتار حساسة جوة كل واحد فينا او علي الأقل انا ...

متغبيش كثير

بن جيهتك يوسف ...

م/ الحسيني لزومي يقول...

تقبل الله منا ومنكم
وكل عام انتم بخير

Dr.A.S. black armor يقول...

جميلة كما العادة
وحروف قلمك متميزة
بس تقلانة فى الرد وحتى الزيارة
كل عيد وانتى بخير وسلامة

نهر الحب يقول...

بجد سلمت اناملك
كلمات جميلة جدا ومعبرة بألم عن
مشاعر رقيقة وحس مرهف ينقصة الامل
تحياتى

من اجل عينيك يقول...

وحشني كلامك يانعومة
النص جميل اوي