وشوشة بسوط حالى ....

الشمس متسرسبه

ملضومه بالاحلام

ومنعكشه نورها

سارح من الشباك

على ضلمه جوايا

والف سد وباب

بتفك ف طلاسم

الغاز على الجدران

انا بشتهى الفرحه

بس السؤال مانع

....

متسرسبه الاحلام

واحد ورا التانى

هو اللى راح ينعاد

ولا اللى جاى تايه

وبكره ليه معضله

مع ان حلمى بسيط

مش طالعه ف العالى

حبة فرح ممكن؟؟

ولا الفرح غالى

يمكن اكون غاويه

اعشق سراب حكايات

ومدوخه روحى

بالجرى ورا اوهام

ياشمس ياجايه

حتعدى م الشباك

وتفكى كام عقدة

ولا حتمشى اوام؟؟