الجمعة، 11 يوليو 2008

وشوش خداعه ........



بيتهيالك قلبه برىء

طيبه روحه حاجه تغيظ

هش وبش ف وشك ياما

ضحكه ف وشك ماهو علامه

فعله ف غدره وقسوه روحه

قادر يرسم وش ووش

وش بيضحك ..تانى يفش

من ورا ضهرك طعنه تهزك

تذهل انه بصدقك غشك

حاجه غريبه وشوش خداعه

بايعه ضميرها بابخس سعر

بريقها يشد...

لكنه يهد...

يخرب اى ايدين تتمد

مش طبعها تعمل يوم خير

ولا بتراعى ف اى جميل

احذر منها وخليك صاحى

زيفها مايخدع قلب يحس


هناك 11 تعليقًا:

نورانة يقول...

ناعومي الجميلة ....رائعة كعادتك .....أنجانا الله من اصحاب الوشوش المتعددة (ما عدا الموبايلات الحديثة ).....
دمت يا رب بخير حال

من اجل عينيك يقول...

زيفها مايخدع قلب يحس

تسلم ايدك على النص ايتها الزهرة الرقيقة
أميرة الأحزان كما يحلو لي ان القبك

ودعي الاحزان يا جميلتي واكتبي فرايحي

زي كده ( النهاردة فرحي ياجدعان
عايزة كله يبقى تمام )

مجموعة الملثمين يقول...

غريب بجد إن نظرتك في الحياة قاتمة قوي كده
الأشكال دي موجوده فعلاً
لكن تجسديها بيدها تواجد أكبر من حجمها

أجمل مافي الشعر رتمة السريع
بجد طريف وجميل قوي
تسلم ايدك يا دكتورة

م/عمرو الحسيني

blue-wave يقول...

حلو اوى البوست
تسلم الأيادى بجد

ناعومى يقول...

حبيبه قلبى نورانه
النص دا تحديداانتى السبب الاساسى فيه
لو تفتكرى دا كان رد على نص جميل ليكى

وفعلا اصحاب الوشوش الكتير ياما اوى

ناعومى يقول...

فطوم روح قلبى
اسكوتى مش انا فى حاله رفض للاحزان فعلا
بس مش عارفه اكتب فرايحى
شكلى مبجيش غير على الوجع

ناعومى يقول...

عمرو انت عمرو عمرو اللى عملت لى التصميم بتاع التبرع بالدم ومعرفتش اوصل له بعدها بسبب اللى حصل
انا سعيده بتواجدك الجميل ورايك
النص دا كان رد على الاخت نورانه
وهو رتمه سريع فعلا
الناس متعددى الوشوش فعلا ميستح قوش يخدو اكتر من حجمهم فى حياتنا
منورنى دايما يابشمهندس

ناعومى يقول...

blue-wave
الجميل هو متابعتك ورايك يادكتره
بجد نورتنى

مجموعة الملثمين يقول...

فعلاً أنا عمرو
أنا معرفش موضوع التصميم وصل لفين
بس لو فيه لسه امل
أنا تحت امرك

علي كل أنا مقدرش إلا ابدي إعجابي بالكتابات الموجوده هنا في المدونة
ربنا يوفقك ويكرمك يا دكتورة ناعومي

م/عمرو الحسيني

ناعومى يقول...

مادمت ع مرو عمرو بقى
يبقى اتمنى تنورنا فى منتدى جديد بس فيه ناس كتير حلوه جدا وبندور عليك من بدرى ومش عارفين نوصل لك
اتمنى تسجل معانا فالمنتدى
اهو منتظره تواجدك الجميل
وعلى فكره فكره الملثمين عجبتنى اوى اوى ربنا يبارك فيكم

http://www.qratees.com/vb/index.php

مجموعة الملثمين يقول...

الله يخليكي يا دكتورة
بالرغم من إن الفكرة وليده
ولسه فيها تحضير كتير
بس انا شاكر تعليق حضرتك
وزيارتك للمدونة المتواضعه

أنا سجلت في المنتدي
وربنا يسهل وأكون عند حسن ظنكم
لكن موضوع بتدوروا عليا ده
.......
خير
أنا متواجد معاكوا
وتحت أمركم في اي خدمة ممكن انفذها